កម្រងច្បាប់ & បទប្បញ្ញត្តិ · Updated

កម្រងបទប្បញ្ញត្តិពាក់ព័ន្ធបច្ចេកវិទ្យាហិរញ្ញវត្ថុ

កម្រងនេះ គឺជាឧបករណ៍ការងារគតិយុត្តដែលត្រូវបានរៀបចំ ធ្វើបច្ចុប្បន្នកម្ម និងធ្វើវិសិដ្ឋកម្មបន្ថែមក្នុងដំណាក់កាលពីរសំខាន់ ផ្អែកតាមវិធីសាស្ត្រក្រមនីយកម្មជាឧត្តមានុវត្តជាតិនិងអន្តរជាតិ និងអភិក្រម “ការចាប់យក (Adoption), ការកែសម្រប (Adaptation) និងការធ្វើនវានុត្តន៍បន្ថែម (Further Innovation)”។ ដំណាក់កាលឆ្នាំ២០២២-២០២៤ ជាការរៀបចំនិងប្រសិទ្ធនាមឈ្មោះ “កម្រងបទប្បញ្ញត្តិគតិយុត្តជាមូលដ្ឋានអភិវឌ្ឍបច្ចេកវិទ្យាហិរញ្ញវត្ថុ” សំដៅដល់ការប្រមូលផ្ដុំច្បាប់និងលិខិតបទដ្ឋានគតិយុត្តទាំងឡាយ ជាអត្ថបទច្បាប់ដើម និងមានកម្មវត្ថុគតិយុត្តពាក់ព័ន្ធផ្ទាល់និងប្រយោល ដែលគាំទ្រនិងជាមូលដ្ឋានអភិវឌ្ឍបច្ចេកវិទ្យាហិរញ្ញវត្ថុក្នុងវិស័យហិរញ្ញវត្ថុមិនមែនធនាគារ ស្របតាមស្ថានភាពបទប្បញ្ញត្តិក្នុងវិស័យបច្ចេកវិទ្យាហិរញ្ញវត្ថុដែលទើបត្រូវបានចាប់ផ្ដើមដំបូងនៅកម្ពុជា។ ដំណាក់កាលឆ្នាំ២០២៥ ជាការធ្វើវិសិដ្ឋកម្មបន្ថែមឱ្យក្លាយទៅជា “កម្រងបទប្បញ្ញត្តិពាក់ព័ន្ធបច្ចេកវិទ្យាហិរញ្ញវត្ថុ” តាមរយៈការធ្វើវិចារណកម្មកម្មវត្ថុគតិយុត្តនៃអត្ថបទនីមួយៗ កាន់តែលម្អិតស្របតាមការវិវឌ្ឍនៃវិស័យបច្ចេកវិទ្យាហិរញ្ញវត្ថុ និងវិសេសភាពនៃការប្រមូលផ្ដុំបទប្បញ្ញត្តិពាក់ព័ន្ធផ្ទាល់ប៉ុណ្ណោះ រួមបញ្ចូលទាំងគោលការណ៍ណែនាំនិងសេចក្ដីណែនាំ ដែលជាលិខិតមានលក្ខណៈគតិយុត្ត។